Liebi Lesefründinne und Lesefründe Mir sind zwei büecherbegeisterti Persone (28gi und 29gi), wo gern en Buechclub gründe möchtet. Vorgstellt hemmer eus e Gruppegrössi vo 4-6 Persone ab ~25gi. Mir würed gern Büecher us verschiedene Genres läse, damit mer chli us sinre Lesekomfortzone usechunnt und au mal Neus entdeckt. Am liebste wärs eus, wenn dBüecher Tüfgang hend, damit mer gnueg Diskussionsstoff hend. Es döff au gern mal en Klassiker si. Dini Vorschläg wäred aber au herzlich Willkomme! Eusi Vorstellig wär, dass mer sich jede ersti Mentigabig im Monet ide Stadt Züri trifft, öpis zäme gaht go trinke/esse, sBuech kritisch bespricht und sich ustuscht. Mir würed eus wünsche, dass mr sich dur das au meh kennelernt und dGruppe e gwüssi Beständigkeit het, will mir glaubed, dass so dBesprechige und Diskussione au spannender und persönlicher werdet. Eus isch wichtig, dass sich alli wohlfühled und au trauet offe ihri Meinig z üssere und über d Zit e fründschaftlichi Atmosphäre entstoh chan. Darum würemer gern mal bimne Kafi luege, ob mr sich au verstaht und de Wille fürs Commitment vo beide Siete ume isch. Falls dich das ahspricht oder irgendwelchi Froge ufwirft, würemer eus sehr über dini Antwort freue. Liebs Grüessli Nina & Chantal

Buechclub in Züri

FabienneW

Hoi zäme

Finde das tönt nach nere super Idee und wür mich gern aschlüsse. Ich bin 30i und wohne in Züri. Han scho immer gern glese und fänds lässig, mich mit andere dezue usztusche. Wür mi freue, vo euch z ghöre!

Liebe Gruess, Fabienne

LimoniLeonie

chanti_

Hey ihr zwei,

ich bin Leonie, 33 und grad erst aus Deutschland nach Zürich zu meinem Freund gezogen. Klingt voll gut, was ihr schreibt 🙂 Hab irgendwie sowas in der Art gesucht, finds auch voll wichtig dass es ne entspannte atmosphäre ist, ungezwungen und sich alle wohl fühlen. Habt ihr schon angefangen? Würde mich freuen, wenn ich noch dazu stoßen könnte! Meldet euch gerne und ganz liebe grüße, Leonie